ENGKILILI, 29 Nov: Program Kampung Angkat Madani (KAM) endang inisiatif pemadu manah ari perintah besai dikena ngemanah enggau mutarka isu-isu bekaul enggau pemansang infrastruktur di kandang menua pesisir.
Kaban Kunsil Nengeri (ADUN) Engkilili, Dr Johnical Rayong Ngipa madah nengah program tentu deka meri empas positif ngagai tikas pengidup rayat ke nguan rumah panjai.
“Udah tentu tu deka ngangkatka tikas pengidup (ari sukut) infrastruktur enggau ke bukai.
“Nya alai, aku meri terima kasih ngagai Perintah Besai laban udah ngagihka belanja ungkup tuju nya laban nya endang dikena nulung rayat sereta raban bekaul.
“Ba sitak aku (DUN Engkilili) enti enda salah ingat siti sekula iya nya sekula MADANI iya nya SK Nanga Tebat enggau mega sekeda rumah panjai.
“Aku meri terima kasih ungkup agih belanja nya lalu ngarapka ulih dikena manah ungkup raban ke diselinting sereta ungkup ngemansangka rayat,” ku iya.
Dr Johnical mansutka jaku timbal nya rambau Pengerami Merarau Segulai Sejalai diatur Gerempung Apai Indai enggau Pengajar (PIBG) Sekula Primari (SK) San Semanju di Lubok Antu, sehari tu tadi.
Ku iya, arapka agih belanja nengah program nya terus ditampung ba taun-taun ti deka datai ungkup rayat di menua pesisir.
Sebedau tu, kena 16 November tu tadi udah diatur sebengkah pengerami nyerahka Projek Kampung Angkat MADANI (KAM) dikemujur Akauntan Menua Malaysia Nor Yati Ahmad ba Sekula Primari (SK) Nanga Tebat Lubok Antu.
Bisi tujuh buah rumah panjai nyengkaum sebuah sekula primari enggau kolej ba sitak DUN Engkilili udah diberi projek nengah Program Kampung Angkat MADANI nya.
Antara rumah panjai, sekula sereta kolej ke udah dipilih tu iya nya SK Nanga Tebat, Kolej Vokasional Betong, Rumah Panjai Entebang Nanga Belaie, Rumah Panjai Liman Legan Nanga Entalau, Rumah Gaerddrick Lidong Asal, Rumah Jelawnie di Nanga Darai enggau Rumah Mulok Nanga Kujuh Sereta Rumah Panjai Unya di Jambu Lalang.-TVS
