ENGKILILI, 28 Nov: Siku orang lunggar umur ari Rumah Panjai Sawing, Merutih Ulu Skrang ditemu selamat sepengudah diripotka lenyau kenyau hari dua ke udah.
Gelau Rayang beumur 82 taun ditemu pengani ba genturung pendiau nya lemi tulang ba sebuah kebun sawit, urung 4 jam pejalai ari rumah iya.
Ku terang Tuai Balai Bomba enggau Penyah Penusah Betong PPgB Vincent Baling Yabi ripot pasal pengelenyau tudah digaga kena 27 November lalu nampung penerang saksi madahka kepenudi iya dipeda ba atas bukit baka deka nurun ke kebun.
“Pegawai Bomba Kanan Jusmandie Jamaie enggau empat iku kaban ngagai endur nya lalu urung pukul 8.30 pagi tadi raban (bomba) bisi nerima penerang tumu senentang orang ke digiga udah ditemu mensia mayuh lalu tudah (orang tuai nya) dipeda lemi tulang ditemu ba sebuah kebun sawit lebih kurang 4 jam pejalai ari rumah tudah,” ku iya.
Iya madah munyi nya lebuh ditelefon TVS bekaul pengawa tetemuka orang lunggar umur ti diripotla lenyau ba Ulu Skrang kena pagi Hari Dua tu tadi ba opis iya di Betong, Hari Empat.
Ku iya madah tudah ke lenyau nya udah dibai pansut ari kandang endur nya sebedau dianjung berubat ngagai Sepital Betong.
Berebak enggau nya tim operasyen ngiga enggau nyelamat udah diketuka urung pukul 12.05 ngalihari, Hari Empat.
Sebedau tu Gelau Rayang diripotka lenyau kena Hari Dua tu tadi enggau palan kepenudi iya dipeda pengani ba genturung pendiau nya ba kebun enggau penyauh kira-kira 2 kilometer ari rumah panjai.-TVS
