KUCHING, 28 Nov: Sarawak tetap deka bejalaika peresa nyerenih standard ungkup nembiak ke ngambi peresa dikumbai Program Dua Dwi- Bahasa (DLP) ngaul nembiak Primari 6 enggau Pom 3.
Menteri Pelajar, Inovasyen Enggau Pemansang Bakat Sarawak, Dato Sri Roland Sagah Wee Inn madahka, pengawa bejalaika peresa nya, taja pia enda ninggalka aspek pengerai runding enggau pemar ke ditapi nembiak sekula.
Ku iya, peresa nya chukup beguna dikena beratika tikas pemansang nembiak ba subjek ti diajar ngagai sida lebuh sesi ngajar enggau belajar.
“Kitai begunaka siti chara peresa ungkup nembiak kitai laban enti enda kitai enda nemu tikas pemereti sida ba pelajar ti dikembuan nembiak kitai.
“Kitai enda ulih nganti nyentuk pom lima napi peresa SPM dikena beratika tikas pemansang pelajar sekula nembiak dalam sistem pelajar laban nya udah laun enggau lebih tumu kitai bejalaika pansik, nya lebih manah.
“Tu deka mantu kitai ngangkatka tikas nembiak nitihka penau sida ukai semina beguna ungkup pengajar tang apai indai ulih meda pemujur anak sida.
Iya mansutka jaku nya rambau pengerami bejadika Aum Antarabangsa Pansik Enggau Inovasyen Pelajar 2024 ba sebuah hotel tebilang ditu, kemari.
Roland Sagah madahka, taja atur nya bebida ari polisi perintah besai tang nya siti pekara ke patut sereta ulih nyadi penyikap nembiak dalam napi peresa ke lebih besai baka Sijil Pelajaran Malaysia (SPM).
Ungkup sarawak ku iya, pengawa peresa nya deka ngaul tiga subjek iya nya jaku Inggeris, Sains enggau Matematik aja.
Dulu ari tu, rambau aum dewan rayat, Menteri Pelajar Fadhlina Sidek madahka pemutus opis menteri iya ngetuka pelajar berorientasika peresa ngagai nembiak di sekula betuju dikena ngurangka penanggul ti ditapi nembiak.
Nya alai, ku iya madah kpm ngambi inisiatif mekuhka ngagai pelajar ba sekula ti bepelasarka pengawa betanya, nyeranggap, peneleba, nitihka konteks sereta pentaksiran ti sechara penuh meda pemansang holistik nembiak.
Chara tu bebida enggau Sarawak ti ngembuan juluk deka bejalaika peresa nyerenih standard ungkup nembiak Primari 6 taun baru lalu bagi nembiak Pom 3 dipejalai belabuh taun 2028.-TVS
