SIMANGGANG, 28 Nov: Ulah enda datai ke sekula ba Sekula Sekondari (SMK) Simanggang diatu majak ngirauka ati, ku Datuk Francis Harden Hollis.
Sapit Menteri Inovasyen enggau Pemansang Bakat Sarawak nya madah, dikena mutarka penanggul nya semua raban lebih agi Gerempung Apai Indai enggau Pengajar (PIBG) patut bejalaika tanggungpengawa diri ke pemaik anak sida dudi hari.
“Pesan aku ngagai kita ambi berat ba senentang penatai (ke sekula).
“Enti iya enda nurun ke sekula reti nya iya deka tinggal kelas, tinggal semua penemu ke ulih ngasuh sida nyulut ba peresa.
“Nyadi nya kebuah nengah PIBG, bala apai indai mesti nemu nama kebuah sida tu kekadang nurun ari rumah tang enda masuk kelas, sida bekedayau limpang ke bukai.
“Nyadi tulung mih enti kitai nadai neritka atur iya ke rugi apai indai empu,” ku iya.
Iya mansutka jaku nya maya Pengerami Apresiasyen Penyulut Tiang Laju Sekula Sekondari (SMK) Simanggang di Dewan Suarah Sri Aman, kemari.
Ku iya, ulah enda datai ke sekula nya enti diteju ukai semina ngeruga pelajar tang mega meri empas ngagai rikod penuh akademik sekula enggau nembiak nya empu.
Nya alai, apai indai mesti seruran matau pejalai anak diri empu lebih agi patut nentuka bala anak diri enda limpang ke bukai maya nurun ke sekula.-TVS
