SRI AMAN, 28 Nov: Pengerami Benak Sri Aman 2024 ke deka diatur ba Waterfront Sri Aman berengkah ari 29 November nyentuk 1 Disember dipelaba ulih matak 80, 000 temuai.
Sapit Menteri Pelajar, Inovasyen Enggau Pemansang Bakat Sarawak, Datuk Francis Harden Hollis madahka, taga nya dikeandal ulih dijapai berindik ari pengatur pengawa ke udah bedajaka program tu ba media rama.
“ Kami ngarap taun tu penyampau temuai ke datai ngagai Pesta Benak serak tu ngelui 50, 000 iku ungkup tiga hari ti deka datai.
Kitai bisi nerima mayuh peminta ungkup bansal ti deka belabuh dibuka kena 29 November tu enggau ngarap nengah mesej bantu ari TVS engka kitai deka matak mayuh agi temuai ari Kuching, Sibu , Miri nyengkaum Semenanjung Malaysia.
“Aku pechaya kitai ulih matak temuai mayuh agi serak tu,” ku iya.
Iya ke mega penyanding penemu komiti besai Pengerami Benak Sri Aman 2024 madah munyi nya rambau dirandau media pengudah Pengerami Apresiasyen Penyulut Tiang Laju SMK Simanggang bepalan ba Dewan Suarah Sri Aman, kemari.
Ku iya madah, Pengerami Benak Sri Aman Edisyen Ke-21 tu deka dipenyadika Premier Sarawak, Datuk Patinggi Tan Sri Abang Johari Tun Openg kena 30 November tu.
Nangkan ke nya, Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar sereta bini iya, Toh Puan Datuk Patinggi Fauziah Mohd Sanusi dipelaba datai nyadi temuai ti dipebasa nyerumba pengerami ngelanjarka kena 1 Disember.
Pengerami Pesta Benak Sri Aman 2024 ngerikodka penyereta tim pemadu mayuh dibanding edisyen ke sebedau tu enggau 31 tim ti bepekit.-TVS
