KUCHING, 28 Nov: Projek Jalai Matang Baru Fasa Dua beungkus RM54.59 juta ditaga tembu penuh taun 2026, ku Datuk Amar Douglas Uggah Embas.
Sapit Premier Sarawak nya, madahka jalai sepemanjai 4.4 kilometer ti berengkah ari Matang Jaya nyentuk ke simpang Jalai Batu-Kawa Matang nya diatu nyapai pemansang fizikal 13 peratus, tumu ari timpuh ti ditetapka.
“Baka ke dipadahka aku tadi, 13 peratus lebih tumu ari ke ditetapka lalu aku ngarapka peratus penemu projek tu deka nambah ngagai 20 ke 30 peratus.
“Palan tu endang sensitif laban ngembuan pengani ke mayuh,” ku iya.
Uggah mansutka jaku timbal nya maya dirandau media sepengudah ngabas taba Projek Ngemanah Jalai Matang Baru Fasa 2 ditu, pagi tadi.
Nangkan ke nya ku Uggah, jalai nya deka dikemanahka nyadi jalai ti ngembuan langkar ke standard, Opis Kereja Raya (JKR) Sarawak ke deka ngembuan jalai arung begembar.
Kelimpah ari nya, Kaban Kunsil Nengeri (ADUN) Tupong, Dato Fazzrudin Abdul Rahman madahka sekeda ari jalai tu iya nya pemanjai 2 kilometer deka ditembuka enggau jampat lalu dibuka ungkup ke guna penguna seraya nganti jalai ke dikemanah nya tembu.
“Kitai pan nemu pemar dalam ngemanahka tikas jalai tu, tang aku suah madah ngagai Yang Berhormat Menteri, Yang Berhormat Sapit Menteri senentang jalai tu endang sekut sereta suah ditengah ninting hari ari 10,000 iku penguna jalai raya lalu kitai begunaka jalai tu tembu digaga enggau jampat.
“Nyadi tadi aku ninga, engka dalam bulan baru..sekeda jalai baru tu, pemanjai dua kilometer deka tembu lalu deka diguna sementara sida ngemanahka jalai sepiak nya,”ku iya.
Ke penerang, sepengudah kunteriktor suba enda mujur nembuka projek ba ba ujung taun 2022, kunteriktor ti nyelamatka projek tu bejalaika projek ngemanahka Jalai Matang Baru Fasa 2 lalu disadang tembu penuh ba taun 2026.-TVS
