BAU, 28 Nov: Anang guai ngambu bisi ngempu tanah puang lebih ari 100 ekar enti nadai bukti ke nyata, ku Sapit Menteri Pengangkut (Sungai enggau Tasik) Sarawak, Dato Henry Harry Jinep.
Ku iya, tanah adat bansa asal patut disukat nengah Opis Tanah enggau Survei (JTS) dikena nyeliahka penyarut tauka diambi orang bukai.
“Bidayuh ngambi tanah ke nyengala tulin (aja), ari aki ini nyentuk apai indai ke sama udah ngemansangka tanah nya.
“Nadai bisi Bidayuh ngambu ngempu tanah (puang) lebih 100 ekar.
“Enti bisi ngambu ngemansangka tanah lebih 100 ekar, nya utai nyelai ‘tau ajih’,”ku iya.
Beambika chunto jeman suba, mensia semina ngena kapak tauka duku, Henry madah deka tetusah sida ulih ngambu ulih ngereja tanah pemesai 100 ekar.
Henry mansutka jaku nya maya Pengawa Nyerahka Pala Tanah, Komunal Bumiputera Seksyen 6, Kanun Tanah Nengeri enggau Surat Pala Tanah, Seksyen 18, Kanun Tanah Nengeri (Betanam
Betupi enggau Kampung Asal) ungkup sitak Kunsil Nengeri (DUN) Tasik Biru di Dewan Sri Singai, Bau, Hari Empat.
Berebak enggau nya, Tuai Raban Bansa (KK) Kampung Segong, Singai Bau, Amy Munga ngarapka mayuh agi rayat Sarawak nyereta program nya dikena mutarka penyarut tauka isu adan tanah enggau pangan diri.
“Anang belaya enggau pangan diri, uji berandau manah gaga adan ke betul nengah chara ngaga surat (kar tanah) ngambika tanah nya ulih disukat Opis Tanah enggau Survei dudi hari,” ku iya.
Sama bisi datai ba pengawa nya Sapit Premier Sarawak, Datuk Amar Awang Tengah Ali Hassan ti udah nyuaka Surat Pala Tanah Seksyen 18, Kanun Tanah Negeri (KTN) ngagai sekeda ari 956 penerima ari tujuh bengkah sitak ba DUN Tasik Biru. -TVS
