KUCHING, 24 Nov: Pemujur Sarawak nyungkak pemansang ekonomi pengudah pandemik diatu udah diaku ba renggat dunya, ku Datuk Patinggi Tan Sri Abang Johari Tun Openg.
Premier Sarawak nya madahka beduduk enggau pemujur nya, dia saintis Itali bisi ati deka bejalaika pansik pasal Pelin Strategi Pemansang Pasca Covid-19 (PCDS) 2030.
“Sebedau tu, bisi saintis Itali datai bejalaika pansik PCDS 2030 Sarawak.
“Tu mandangka orang Itali pan bisi ati deka belajar ari kitai. Maya nya kitai bisi madah ngagai sida senentang pemansang ke udah dijapai, dalam timpuh lima taun ti deka datai, nama pemansang ke udah nyadi, ti udah digaga, bungkur penyambung nyengkaum di Bintulu.
“Sida engka nyangka kitai bisi jematan baka nya. Menua Amerika aja bisi jematan baka nya. Suah aku nyebut pasal tu, baka jematan ba San Fransisco,” ku iya lebuh mansutka jaku nya beserimbai enggau Pengerami Tautan Kasih Gedong Permulaan Kami (GPK) 2024, ti diatur GPK Bintulu.
Berebak enggau nya, iya nerangka perintah Sarawak diatu deka terus ngemansangka sitak Jepak.
“Perintah Sarawak udah ngemansangka Jepak, empai lama kami udah ngemendarka jematan Dual Carriageway. Ari jematan tu terus ke padang bilun Bintulu.
“Kami ngemendarka tu rambau aum kabinet empai lama tu tadi. Nya alai, diatu Jepak ukai semina nyadi genturung pendiau baka dulu suba,” ku iya.
Sebedau tu, Sapit Premier Sarawak Datuk Amar Douglas Uggah Embas madahka, projek jematan Bintulu – Jepak ke meraka Sungai Kemena ditaga tembu bulan dua taun baru.
Jematan nya ti ngembuan pemanjai 1.2 kilometer dijangka ngemuntangka pemindah mensia mayuh ari mengeri ke Jepak, seraya nuju ke padang bilun Bintulu sereta endur buka ke semak dia.-TVS
