DALAT, 24 Nov: Kerejasama enggau runding ti sepenemu ketuai enggau rayat nyadi kunchi pemujur ngatur pemansang sesebengkah menua, ku Tan Sri Datuk Amar Mohamad Asfia Awang Nassar.
Speaker Kunsil Nengeri (DUN) Sarawak nya madahka pekara nya chukup beguna laban enti nadai pekara pugu nya pemansang ba sesebengkah menua baka di Dalat tentu tusah deka dikemujur.
Nya alai, Mohd Asfia bisi muji pengawa iring ADUN Dalat Dato Sri Fatimah Abdullah laban ke udah mayuh mai pemansang ngagai pelilih nya asil ari sukung rayat mayuh ke pemaik sida ke rebak diatu enggau rebak dudi.
“Aku meda Dalat, aku beratika Kompleks Pengintu Pengelantang Dalat (KKD) tu.
“Tu mandangka runding pengari rayat (ADUN Dalat) ditu, chukup silik, chukup berurun, tusun runding, pikir iya…ngemujurka pemansang ba sitak tu.
“Nyadi kita, terus nyingkang ke mua, menalan (DUN) kitai, politik kitai, ekonomi kitai,kitai empu, menua kita semua, chukup berurun, pesaka kitai, dijaga kitai ungkup anak telesak kitai,” ku iya.
Iya mansutka jaku nya maya Aum Delegit Parti Pesaka Bumiputera Bersatu (PBB) Sitak Kunsil Nengeri (DUN) N.56 Dalat ba Kompleks Pengintu Pengelantang Dalat, sehari tu tadi.
Nangkan ke nya, Tuai Komiti Indu Parti PBB Sarawak, Dato Sri Fatimah Abdullah madah, pemansang selampur Dalat endang asil pengeransing bala komiti PBB Sarawak ke nadai nemu leju nyukung pangan diri.
“Penyerakup tu chukup beguna, beserakup bela besukung enggau pangan diri. Penyerekakup, kerejasama enggau solidariti dalam raban parti kitai (PBB), endang kunchi pemujur kitai ngelama tu.
“Nengah penyerakup, kitai ulih ngempung penemu kitai, kitai mega ulih nyapai juluk ke bela diining semua enggau deka meda iya nyadi nyata,” ku iya.
Urung 1,000 iku kaban parti PBB DUN Dalat bisi datai ngulu aum deligit nya.
Sama bisi datai Penulung Tukang Wang Kaban Supreme Kaunsil PBB, Datuk Dr. Ripin Lamat.-TVS
