SIMANGGANG, 24 Nov: Projek Transformasyen Menua Pesisir (RTP) du sitak Kunsil Nengeri (DUN) Lingga bejalai enggau lanchar sereta nitihka timpuh.
Kaban Kunsil Nengeri (ADUN) Lingga, Dayang Noorazah Awang Sohor madahka, naka tu bisi 50 ke 60 projek RTP udah diperambu deka dipejalaika.
“Puji Tuhan, projek RTP ba sitak Kunsil Nengeri N.28 Lingga bejalai enggau manah. Penyampau semua projek iya nya dalam 50 ke 60 iti.
“Aku enda ulih netapka penyampau nya laban bisi ubah ungkup 2024 nya.
“Bisi 40 lebih kebendar laban bisi nyadi betukar projek nya kebuah bisi projek kurang ti patut ditambah enggau duit.
“Ungkup 2025 naka tu bisi 50 projek tang kitai enda nemu tang lebuh bisi nyadi penusah ngenyit ba endur kitai, kitai enggai enda nukar projek nya kekadang nya nemu bekurang,” ku iya.
Ku terang Dagang, penyuah nukar nama projek (NOC) ti suah nyadi iya nya entara isu besai ti ngaul pengelaun bejalaika sesetengah projek RTP di sitak nya.
“Lebuh bisi betukar nama projek, nya deka ngujungka projek napi pengelaun tauka tejanggal.
“Pengawa nukar nama projek nya ukai digaga ketegal enda ulih nangkup peminta rayat semina kitai deka ngemeratka projek ti dikemerat baka bisi nyadi ngenyit penusah jalai runtuh tauka rumah runtuh.
“Nyadi nya ti diberi perati berat. Nya kebuah mayuh nyadi NOC.
“Kebendar endang kitai nguji nyeliahka nama projek betukar tang kitai enda ulih melabaka penusah ngenyit nyadi lebih agi ba rumah panjai tauka sitak genturung pendiau,” ku iya.
Ungkup taun 2025 ku iya, sepenyampau RM4 juta belanja udah diagih ngagai sitak Sri Aman enggau RM1 juta ungkup Pelilih Mit Maludam.-TVS
