SARATOK, 24 Nov: Raban apai indai diperansang ngerebut peluang ke bisi disediaka perintah nengeri dikena ngemansangka modal mensia baka ke udah dirintaika dalam Pelin Strategi Pemansang Pasca Covid-19 2030 (PCDS 2030).
Senator Pele Peter Tinggom madah, chukup rugi enti nyema polisi manah nya enda dikena manah laban perintah udah nyendiaka agih belanja ke besai.
“Baka ke udah dipadahka Yang Amat Berhormat Premier Sarawak maya mantaika bajet ba Aum Kunsil Nengeri ke udah, asil (diulih) Perintah Sarawak udah niki manggai RM15.8 bilion lalu ngena asil ke mayuh nya iya udah ngagihka sebagi ari asil nya ungkup pemansang modal mensia ba sarawak.
“Siti ari polisi manah ke udah dipadahka iya deka meda bala anak (Sarawak) ke benung belajar ba palan pelajar tinggi di Malaysia enda ibuh agi tusah ati bisi duit belanja diberi taun baru.
“Enti enda silap aku diberi nengah Yayasan Sarawak sepenyampau RM1,200 siku,” ku iya.
Iya mansutka pekara nya maya Pengerami Makai Lemai Ngintu Taun Ke-60 Tadika Publik Saratok diatur ba Dewan Sri Krian, ditu malam tadi.
Ku iya, mensia mayuh mega patut bejalaika pengawa nyebar berita manah nya ngagai orang bukai ngambika bela ngasaika pemaik.
Tandu iya, nya nyata mandangka komitmen perintah Saraak ke chukup bebendar ngemansangka modal mensia ba menua tu.
Antara polisi ke bisi dirintai nengah PCDS 2030 iya nya meri bantu pelajar pechuma ba semua Palan Pelajar Tinggi (IPT) dipenggi perintah Sarawak.
Udah nya bantu tiket bilun dikena pulai ari Semenanjung ke menua asal diri kelimpah bejalaika sistem merit ungkup masuk sekula antarabansa.
Sama bisi datai Kaban Kunsil Nengeri (ADUN) Meradong Datuk Ding Kuong Hing, ADUN Krian Friday Belik, Pemangku Residen Betong, Mohd Dino Amid sereta ke bukai.-TVS
