SARATOK, 24 Nov: Lima projek beungkus urung RM100 juta ba sitak Kunsil Nengeri (DUN) Meradong dibaruh kemata Ejensi Pemansang Delta Rajang (RADDA) dipelaba deka ditinda tengah taun baru.
Kaban Kunsil Nengeri (ADUN) Meradong Datuk Ding Kuong Hing madah, konsultan ungkup semua projek nya udah dipadu.
“Diatu semua konsultan ungkup projek dibaruh RADDA udah dipadu lalu ungkup sitak aku Meradong bisi lima projek enggau benung proses ngadu tempa tukuh, nyangka tengan taun baru deka dibuka tinda,” ku iya.
Ding mansutka pekara nya maya dirandau media pengudah ngulu Pengerami Makai Lemai Ngintu Taun Ke-60 Penumbuh Tadika Public Saratok ba Dewan Sri Krian Saratok, malam tadi.
Ku iya, lima projek tu iya nya Ngemanah Tebing Sungai Bintangor, Ngemanah Taman Reakreasyen Bintangor, Ngaga Baru Dewan Central Bintangor Sereta Ngemanah Sistem Paip Ba Semua Mengeri Bintangor sereta ba sebuah genturung pendiau di Sungai Tulai.
Ba pengerami nya, Ding bisi ngagihka belanja RM10,000 ungkup Tadika Public Saratok dikena sida ngatur aktiviti ke bekaul.-TVS
