SIMANGGANG, 24 Nov: Karnival Nembiak ke diatur Opis Pelilih Sri Aman begulai enggau Palan Servis ADUN N. 28 Lingga endang patut diperunding nyadi achara ninting taun.
Taja pia ku ADUN Lingga, Dayang Noorazah Awang Sohor pekara nya bepanggai ba pemutus komiti pengatur nyengkaum status agih belanja ti deka diberi.
“Endang patut kitai berundingka mayuh bengkah pekara lebih agi ari sukut agih belanja enggau pekara ke bukai laban mayuh komitmen.
“Kitai nemu Sri Aman tu seruran penuh enggau mayuh macham aktiviti ungkup minggu baru.
“Kitai deka begulai ngerami Pesta Benak, nyadi mayuh macham pekara ke patut dikemeratka kitai tang nya ukai siti penanggul ngagai kitai ngatur sekali agi,” ku iya.
Dayang mansutka penemu nya munyi nya rambau dirandau media pengudah bejadika Karnival Nembiak DUN N.28 Lingga 2024 di Kompleks Lumba Sri Aman, kemari.
Iya mega andal achara nya ulih dikemujur tauka abis nadai dua taun sekali.
Tandu iya, bepelasarka ari timbal ti diterima, achara nya dijangka deka diatur ba skala besai taun baru.
Karnival Nembiak Renggat DUN Lingga 2024 ti diatur pengelama dua hari berengkah 23 nyentuk 24 November nerima sambut ti manah enggau matak urung 1,500 iku raban nembiak di bagi menua Sri Aman .
Antara aktiviti ke bisi diatur ba program nya Baka Pekit Main Bol, Petanque, Senamrobik, Panggau Pemerindang Nembiak, Belia Idol, Lumba Rakyat, E-Sport enggau Pekit Main Dart.-TVS
