KUCHING, 24 Nov: Semua renggat komuniti di wilayah tu mesti meretika senentang tangkup pengawa diri bela nyaga paip bomba ti bisi disediaka semak genturung pendiau sida.
Sapit Premier Sarawak Datuk Amar Dr Sim Kui Hian madahka, komuniti lokal mesti nemu pemesai guna nyaga paip bomba laban nya tanggungpengawa semua raban dikena nyeliahka sereta ngurangka penusah angus nyadi.
“Kitai mesti nemu pemesai guna pekara tu. Komuniti, pengelikun rumah nya mih tanggungpengawa semua. Mesti nesau, madah ngagai orang ke diau berimbai enggau kitai laban ti bisi penusah angus nyadi, semua ulih dituntung penusah ke sama.
“Nya alai kitai mesti bisi tangkup pengawa baka tu, ukai semina kitai siku aja, tang nyengkaum bala bakih, orang ke diau semak kitai sereta ke bukai,” ku iya.
Iya mansutka jaku nya rambau nutup Program Pengelikun Penusah Angus sereta Bakih Paip Bomba ba Dewan Perpaduan RPR Batu Kawa ditu, kemari.
Tandu iya, program nya ti diatur Opis Kaunsil Padawan (MPP) dengan ti bekerejasama enggau Opis Bomba enggau Penyah Penusah Malaysia Nengeri Sarawak (JBPM) siti insiatif dikena negapka perayat lokal ngambika sida nemu chara proaktif nentuka pengelikun genturung pendiau diri.
Ba dalam program nya mega, Dr Sim ngelalau semua rayat mesti menatika pengelikun diri sereta nemu chara nagang enggau nyeliahka penusah angus ari nyadi ba genturung pendiau sida.
Iya nyemetak madahka, pengawa ngemeratka pengelikun nya ukai semina dilempai ba Opis Bomba enggau Penyah Penusah Malaysia (JBPM), tang ngaul semua orang.
“Pekara tu endang patut dikenatika di Sarawak.
“Enti kitai semua begempung, besaup ulih mutarka tauka ngiga chara dikena nagang sereta nyeliahka penusah angus nyadi. Aku enggai penusah baka tu nyadi.
“Nya alai, pengelikun penusah angus mesti ditemu semua orang, tangkup pengawa kita semua.
“Pekara ti pemadu beguna diatu iya nya semua perayat mesti nemu tauka belajar pasal nagang penusah angus renggat tumu. Penemu nya sigi patut dikemeratka,” ku iya.
Nangkan ke nya, Dr Sim ke mega Kaban Kunsil Nengeri (ADUN) Batu Kawah, gagit sereta gaga ati meda sambut ari bala mayuh ke bisi datai ngulu program pengelikun penusah angus enggau bakih paip bomba ke diatur serak tu.-TVS
