KUCHING, 24 Nov: Raban pemekuh inovasyen bidang pelajar di Sarawak diperansang ngiga chara ke engkeman dikena mutarka isu ngusa pengelandik macha, nulis enggau ngira renggat tumu ngaul nembiak mit.
Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn madahka, isu nya sebedau tu kala dibantai, tebal agi maya timpuh nembiak enda ulih besekula ketegal pandemik Covid-19.
“Dua taun kitai napi isu nya sekumbang menua tu dituntung pandemik. Bisi sekeda nembiak enda chukup jam ngaga pengawa sekula sida, masuk ke primari dua enggau tiga, enda nemu macha, nulis sereta nerangka sesebengkah pekara.
“Nya alai, tu mih isu ti patut diberi perati berat, tebal agi bala pengajar. Kita patut meransang, ngembing nembiak kita ngambika sida ransing agi belajar,” ku iya.
Iya mansutka jaku nya rambau bejadika Program Nutup ‘Girls Code Mobile App’ ba Tegas Digital Village ditu, kemari.
Sagah mega mekuhka senentang pemesai guna bala pengajar, apai indai enggau inovator bekerejasama mantu nambahka daya belajar ngaul nembiak, kelebih agi ngiga chara mutarka isu ke bisi nyadi, ketegal pandemik
Iya nerangka, pengawa ti dipejalaika raban AGAPE ari Sarawak, ti nyadi champion taun siti nyin suba patut nyadi chunto laban udah mujur nempa aplikasyen dikena mantu nembiak mit ke nyelai pendiau belajar ngena chara ke lebih manah.
‘Girls Code Mobile App Challenge’, siti program Sains, Teknologi, Injiniring enggau Matematik (STEM) Sarawak ti betuju negapka nembiak mit sereta nembiak indu nempa aplikasyen ke ulih mantu mutarka penanggul ke ditapi komuniti ti meri empas ba dalam pengidup sida.-TVS
