SARATOK, 24 Nov: Perintah Sarawak deka bejalaika sekeda pansik dikena mantu nembiak Bumiputera ke benung belajar ba sekula bansa China (SJKC) ba wilayah tu.
Sapit Premier Sarawak Datuk Amar Professor Dr Sim Kui Hian madah, bantu nya nyangka nengah tuiseyn ngambika nembiak Bumiputera ba sekula primari tauka Tadika China ulih ngemanah agi tikas pelajar sida.
“Sebedau tu bisi dikerandau pasal chara dikena mantu nembiak Bumiputera ke benung belajar ba sekula China, nyangka nengah tuisyen awakka sida jampat agi meretika pekara ke dipelajar ba sekula.
“Nyadi dikena mantu nembiak Bumiputera, ukai semina ba Saratok, tang mega ba Sarikei, Bintangor, Sibu enggau Kuching.
“Ditu bela mayuh nembiak Bumiputera ke ngerejister diri belajar ba sekula primari China enggau Chung Hua Middle Schools.
“Nyadi kami benung bejalaika pansik baka ni chara ulih mantu bala nembiak tu,” ku iya.
Dr Sim madah munyi nya nengah teks jaku iya ke dibacha ADUN Meradong ba sebengkah pengerami ke diatur ba Saratok, malam tadi.
Ku iya nengah komitmen semua mega dikearapka pengidup bala nembiak ke belajar ba sekula primari enggau tadika China terus diintu.
Tandu iya, perintah Sarawak dibaruh iring Datuk Patinggi Tan Sri Abang Johari Tun Openg seruran bebendar ngemansangka modal mensia nengah bemacham inisiatif.
Ba pengerami nya, Dr Sim bisi ngungkupka agih belanja sepenyampau RM10, 000 ngagai TAdika Public Saratok.-TVS.
