SIBU, 23 Nov: Siku indu menua tu ke beumur 50 taun gawa nyadi Pegawai Kanan ba sebuah super makit rugi penyampau RM549,000 pengudah iya teperasa enggau skim meranak puku pelesu ba media rama.
Tuai Polis Pelilih Sibu, ACP Zulkipli Suhaili madahka, tudah iya nekan kaul paut tauka siti link iklan ba laman facebook sereta terus bekelala enggau saspek ti ngena nama ‘Chole Sdr’ nengah aplikasyen Whatsapp.
Ku iya madah, saspek besemaya deka meri penguntung ke besai sereta nepu tudah ke dalam gerup Whatsapp ti disebut ‘SPDR-Aia Super Plan’
Udah nya, saspek minta indu nya bantai turun aplikasyen online ngambika meri penerang diri sereta bebayar dikena ngemunka pengawa meranak puku nya.
“Berindik ari nya, tudah (indu nya) udah ngaduka pengawa bebayar 12 kali entara 30 Oktober nyentuk 14 November 2024, penyampau RM549,000 ke dalam tiga akaun bank lokal ti enda sama.
“Pengudah semua pengawa bebayar nya mujur, tudah mansutka semua duit meranak puku baka ti udah disemaya.
“Taja pan pia, saspek minta bayar tambah penyampau RM981,540 dikena ngulihka baru semua duit ke udah diperanakka iya, sereta udah nya baru nemu diri kena tipu,” ku iya.
Ku terang iya, tudah udah nya berumban ngaga ripot polis kena 21 November tu tadi.
Kes ditasat nitihka seksyen 420 kanun keseksaan laban nipu.
Berebak enggau nya, zulkipli ngelalau mensia mayuh ngambika bejejaga sereta meresa silik sebedau nyanggup diri meranak puku ti nyendiaka penguntung ke besai.
Mensia mayuh ulih meresa status meranak puku nengah bank menua Malaysia tauka Komisyen Sekuriti Malaysia sebedau ngirum tauka nepu duit.
Pengawa meresa nya ulih dipeda nengah laman web ke bekaul.-TVS
