BINTANGOR, 23 Nov: Mensia mayuh ditangkan anang enda meri perati berat senentang pengekai penyakit Rabies, laban tebal agi kes ti diripotka ngaul jelu ke ditupi.
Kaban Kunsil Nengeri (ADUN) Meradong, Datuk Ding Kuong Hiing nyemetak madahka, ambika chunto, kes pemati ngaul siku perayat lokal empai lama tu tadi ngayanka penyakit Rabies ulih nabanka nyawa mensia.
“Bepelasarka asil tasat, tudah nadai sejarah tauka rikod kala diketup jelu, tang bisi nginang tiga iku mayau ti diasuh iya bekedayau, seraya siku ari mayau nya enda diberi tuchuk vaksin sereta bibas begulai enggau jelu bukai ba luar.
“Majoriti kes ti bisi diripotka nya ngaul jelu inang tauka jelu tupi,” ku iya.
Iya mansutka jaku nya ramabu Program Pemereti Pengerai ke diatur ba Diwan Mayuhguna Opis Pelilih Meradong, ditu kemari.
Ku terang Ding, program pemereti senentang badi rabies enggau chara dikena nagang enggau nyeliahka penyakit nya endang beguna amat.
“Anjung diri jampat berubat enti nyema kita bisi kena ketup jelu,” ku iya.
Ding mega madahka, Rabies siti bansa penyakit ke ulih diseliahka nengah chara ke betul sereta jampat.
Program pengerai beserimbai enggau pesta meradong nya dirichahka enggau bemacham aktviti bukai baka meri tuchuk vaksin anti Rabies, lisin sereta masang mikrocip ukui, licha, eksibisyen sereta program meri darah.-TVS
