PUTRAJAYA, 23 Nov: Opis Menteri Pemansang Indu, Ruang Bilik Enggau Komuniti bekerejasama enggau Opis Pemansang Indu ngatur Program Belanda Oren beserimbai enggau Hari Mutarka Ulah Kasar Ngaul Indu Taun 2024.
Menteri ke nguasa opis menteri nya, Datuk Seri Nancy Shukri madahka, program nya diatur betuju nambahka pemereti orang indu pasal ulah kasar ti majak nyadi.
“Pemereti nya udah bisi dalam orang indu, nya alai program baka tu diatur ngambika komuniti luar ukai semina indu , tang bala kaban, diri sebilik, tuai komuniti, NGO bela ulih mantu sida ke tebunsa tu.
“Kekadang sida empu malu, tauka nangi ngaga ripot laban enggaika dilengka laki sida, nadai alai bepanggai sereta nangika anak sida nadai apai sereta orang ti dikeandalka anak enggau ruang bilik,” ku iya.
Nancy mansutka jaku nya ngagai media seninjik ngulu Program Belanda Oren beserimbai enggau Hari Mutarka Ulah Kasar Ngaul Indu Taun 2024 ditu, pagi tadi.
Program nya nungkatka chura oren mega dipilih nyadi anda solidariti nyukung kimpin nya seraya ngayanka pengidup jemah ke lebih likun, sereta bibas ari kes ulah kasar, tebal agi ngaul indu.
Kenyau ari taun 2000, ninting 25 November udah dipilih nyadi hari antarabansa dikena mutarka ulah kasar ngaul indu nengah resolusyen Gerempung Pengelikun Bansa Dunya (PBB).
Nancy mega nangkan mensia mayuh patut berani ngeripot kes ulah kasar sereta tau betelefon nengah lumur Talian Kasih 15999. -TVS
