KOTA SENTOSA, 23 Nov: Raban penyereta Kelas Ngaga Sugu Tinggi ke diatur Akademi Gerempung Dayak Iban Sarawak (ASADIA) dilalau anang leju ngerembaika penemu ngaga ngepan pesaka ke udah dipelajarka sida ari akademi nya.
Dalam sebengkah penerang Tuai ASADIA Mabong Unggang madahka, penemu nya mesti dikerembai ngambika mensia mayuh bela ampit belajar sereta ulih ngaga tauka ngibun sereta ngempu genap keresa pesaka lebih agi ke dipenggi bansa Iban.
Ku Mabong kelimpah ulih ngaga kereban pesaka ungkup diri sebilik sida mega dikearapka ulih nguna penemu ari kelas ke diatur ASADIA dikena nempa produk krafjari awakka ulih nyadika dagang.
Sebedau tu bisi 30 iku raban udah mujur nembuka Kelas Ngaga Sugu Tinggi Renggat Ke-2 diajar Victoria Jimmy enggau Tanjong anak Tinggom sereta dibantu Bronica Michella anak Baran.
Kelas nya diatur ba Indu Opis SADIA di Kota Sentosa sereta disukung Kaunsil Kraf Sarawak.
Ku terang Mabong, Sugu Tinggi mega kala dikumbai orang Sugu jegit iya nya siti ari kereban ke suah dikena ungkup ngepan Iban.
Ari ngena Sugu Tinggi ku iya deka ngasuh orang indu ke ngena lebih manding tauka ranjing agi dipeda.
Nya alai, enti nadai Sugu Tinggi anta sida ke indu ngena ngepan enda serampul sereta timpang dipeda.
Berebak enggau nya, iya ngarapka pengawa kereban pesaka nya enda putus dihgaga ngambika pesaka ngepan Iban meruan bisi dipeda, dikerembai kelimpah dijual nyadika pun penatai pemisi.-TVS
