LIMBANG, 21 Nov: Dua pengajar mujur ngidupka diri ba penusah angus ke nuntung sebuah kuarters alai seduai diau ba Sekula Primari (SK) Batu Danau ditu pagi tadi.
Komander Operasyen, Ridzuan Abdul Rahman madah, raban sida nerima kangau kes pukul 7.27 pagi sereta nganjung enam kaban Balai Bomba enggau Penyah Penusah (BBP) Limbang ngagai palan penusah.
“Penusah angus nya ngaul sebuah kuarters pengajar ke digaga ari kayu enggau semin lalu angus lengis.
“Dua pengajar lelaki ke diau ba rumah nya mujur pansut ngidupka diri,” ku iya nengah sebengkah penerang sehari tu tadi.
Ku iya, pengawa ngerara api ngena siti jalai ai ari paip bomba ke disambung ngagai kereban pengangkut ai bomba enggau siti agi jalai ai ngena dua pala mujur ngerara api ke benung nganguska rumah nya.
“Penusah angus nya nadai ngujungka penusah bakal tauka bebadi nyawa.
“Pengudah nentuka api nadai agi idup raban bomba bekejang pulai baru ngagai balai,” ku iya.
Kebuah penusah nyadi enggau penyampau pengerugi ketegal penusah angus nya agi dipansik.-TVS
