SRI AMAN, 21 Nov: Operasyen Nyidi enggau Mantu (SAR) siku orang tuai ke dipelaba lenyau ari Rumah Panjai Ringgit Ibol, Sungai Raya ditu agi puntan.
Tuai Opis Bomba enggau Penyah Penusah (JBPM) Zon 3 Sri Aman, PgB Mohd Rais Adham Rosalan madah, raban bomba enggau penyah penusah sereta ejensi bukai udah bejalaika pengawa ngiga bepun ari kandang rumah panjai nyentuk ke kebun tudah ke diripotka kepenudi dipeda.
“Operasyen SAR sehari tu dipejalaika kami nyentuk ngagai 5 km radius bepun ari rumah panjai nyentuk ngagai kebun tudah ke lenyau.
“Bisi dua raban begigaka tudah lalu pengawa SAR tu diketu naka pukul 5 lemai tadi lalu kami deka nyambung pengawa tu baru pagila,” ku iya maya dirandau pengari TVS Betong lemai tadi.
Tudah ke lenyau iya nya Niang Lasa, 75 taun bisi ngembuan sejarah sakit tungkul ati nurun ari rumah betanchut panjai sereta nadai bebaju.
Tudah dipelaba nurun kebun kira 17 km penyauh ari rumah panjai.
Operasyen SAR nya disaup raban polis sereta raban APM nyengkaum urung 20 iku pengani rumah panjai.
Ba sebengkah agi endur, siku nembiak lelaki beumur 23 taun ari Rumah Jinis, Tekalong Melugu Skim ditu bela diripotka lenyau.
Nitihka penerang, tudah ke lenyau benama Jackson Bar anak Runi pansut ari rumah nadai madahka sida sebilik.
Maya nurun ari rumah tudah dipadahka ngena baju burak enggau betanchut sintak mirah sereta ngembuan sejarah ditepan penyakit sawan.
Naka pukul 5 lemai tadi, operasyen SAR ngiga tudah agi puntan enggau deka disambung baru pagila.-TVS
