KUCHING, 21 Nov: Dua deriba ditan laban sepengudah ditemu kelalu mayuh ngirup ai bisa ba sebengkah operasyen ke dipejalaika Unit Pansik enggau Penerit Adat Trafik (BSPT), Indu Opis Polis Pelilih (IPD) Kuching berengkah pukul 11.30 malam nyentuk 4 pagi tadi di Jalai Tabuan ditu.
Pemangku Tuai Polis Pelilih Kuching, Superintendan Merbin Lisa madah, operasyen nya betuaika siku pegawai kanan begulai enggau 13 polis ke bukai betuju nentuka penguna jalai raya nadai deriba mabuk.
“Ba operasyen tu, dua iku deriba lokal, siku lelaki enggau indu beumur 28 taun ditan sereta dibai ngagai IPD Kuching ngambika dipansik. Asil pansik kesuh seput ngena perengka eba ii (evidential breath analyzer) tetemuka dua iku saspek positif ai biasa ke ngundan 111 miligram nyentuk 140 miligram ai bisa dalam tubuh tauka 100 mililiter dalam darah.
“Berebak enggau nya, kededua saspek udah dipansik nitihka Seksyen 45a(1) Akta Pengangkutan Jalan 1987 laban deriba kerita sepengudah ngirup ai bisa lebih ari tatak dikemendar iya nya 50 miligram alkohol dalam 100 mililiter darah,” ku iya nengah sebengkah penerang sehari tu tadi.
Ku iya, nyema dikenuku salah , ulih diukum jil pengelama enda ngelui dua taun enggau ukum mata duit enda kurang ari RM10,000 sereta enda ngelui RM30,000 kelimpah ditarit lisin deriba pengelama enda kurang ari dua taun berengkah iya dikenuku salah.
“Sekumbang operasyen nya mega, 89 iiku enggau 83 kereban pengangkut udah diperasa ngaul 62 kerita, 10 motosikal, enam 4WD enggau lima MPV.
“Bisi 20 limpir saman dikeluarka mungkur bemacham penyalah baka nadai lisin deriba, lisin udah tamat timpuh, nadai insurans, LKM abis timpuh, nadai ngena tali belulang, lumur plit enda nitihka atur, ngubah exzoz, nadai chermin tisi enggau nadai mandangka P.
“Operasyen nya dipejalaika ari sepanjai maya dikena ngurangka penyadi aksiden jalai rayat ketegal deriba ti kelalu mabuk.-TVS
