SPAOH, 21 Nov: Pengawa ngatur Program Hari Ngiga Kereja enggau Pelajar ba sekula-sekula sekondari di menua pesisir endang siti bukti nyata Perintah Sarawak ngembuan akses pelajar ke adil di wilayah tu.
Residen Betong Richard Micheal Abunawas madah, program baka nya deka meri empas positif sereta mantu nembiak ari menua pesisir bulih penerang ke beguna bekaul enggau pelajar ungkup guna sida sepengudah tembu sekula ila.
“Nengah program tu bala anak ari menua pesisir deka bulih penerang terus pasal batang pengawa enggau kuing tuju belajar.
“Tu beguna amat laban ketegal nadai bulih penerang ke nyemetak ngujungka bala nembiak lepas SPM tauka STPM puntan nerima kangau nampung pelajar tauka batang pengawa.
“Taja pan sekeda ari sida ngembuan pemutus peresa ke manah tauka ngembuan rikod ke nyulut ari segi kokurikulum ba sekula,” ku iya.
Iya madah munyi nya nengah teks jaku iya ke dibacha Pegawai Pelilih Mit (SAO) Spaoh, Denny Lim maya Pengawa Bajadika Program Hari Ngiga Kereja enggau Pelajar 2024 diatur ba Dewan Sinaran SMK Spaoh, sehari tu tadi.
Ku iya, program nya ulih nyadi tangga dikena bala nembiak ari menua pesisir bulih penerang ke beguna sereta nyingkang ngagai tikas ke lebih tinggi.
Berebak enggau nya, iya madah raban ari Opis Residen Betong deka seruran meri kerejasama enggau nyukung semua ejensi bekaul dalam ngemujurka program pelajar seraya meri penerang ungkup nembiak ari menua pesisir.
Ke penerang bisi 240 nembiak pom 5 ari lapan buah sekula sekondari sereta kolej vokasional di pelilih Betong bisi ngulu program nya.
Sama bisi ngulu program tu Pegawai Yayasan Sarawak Azalina Ali Omar.-TVS
