KUCHING, 18 Nov: Penerang senentang puncha minyak enggau gas di Sarawak deka dikunsika maya aum besai bekaul enggau gis, ku Dato Sri Julaihi Narawi.
Menteri Utiliti enggau Telekomunikasyen (MUT) Sarawak nya madahka raban sida sedia deka bekunsi penerang ti engkeman senentang status puncha nya.
“Kami deka bekunsika ba aum gas, ke alai tu palan ti engkeman dikena bekunsika penerang nya.
“Sarawak nadai enggai bekunsi penerang ti engkeman, kitai deka bekunsika penerang nya ila enggau pemadu baru,” ku iya.
Iya munyi nya lebuh dipinta meri timbal senentang penerang ti dikunsika Menteri Ekonomi, Rafizi Ramli bekaul enggau puncha minyak enggau gas ba di Semenanjung Malaysia diatu ke majak kusut ngagai 50 peratus.
Berebak enggau nya nitihka penerang ti dipansutka media, Rafizi madahka puncha nya sebedau tu meri pengelebih ngagai penumbuh ekonomi menua enggau penatai pemisi tang puncha nya diatu semina bisi di Sabah enggau Sarawak.
Rafizi madahka senentang pengurang puncha minyak enggau gas di Semenanjung Malaysia iya nya pemar ti pemadu besai ngagai perintah dalam pengawa nyadung enggau nentuka ungkup ngagai tetiap buah nengeri.
Taja pia Julaihi enggai madahka enggau silik senentang pekara nya. – TVS
