DEBAK, 18 Nov: Program Simulasi Pengkalan Luan dikena napi Monsun Timur Laut (MTL) deka diatur ba Dewan Perpaduan Debak kena 4 Disember tu.
Kaban Kunsil Nengeri (ADUN) Saribas Datuk Mohd Razi Sitam madah, program nya nyadi atur penyikap opis menteri dikena napi penusah bah enggau simulasi nya mega deka ngaul semua ejensi sereta opis perintah bekaul Penyangga Penusah Bah di Betong.
“Ungkup Betong Opis Menteri kami (Opis Menteri Pemansang Indu, Anak Mit enggau Pengelantang Komuniti) deka ngatur siti program simulasi penyanga penusah Monsun Timur Laut (MTL) ke diatu bulan Novemver.
“Enda lama agi bulan Disember ke alai kitai mesti nyikap diri ngena siti simulasi penyanga penusah ti deka diatur kena 4 Disember bepalan ba Debak iya nya di Dewan Perpaduan ungkup menua Betong,” ku iya.
Razi mansutka jaku nya maya dirandau pengudah Mini Program Outreach Santuni Komuniti ba Rumah Panjai Inchok Embas Jalan Dit di Sabar Lama Debak, kemari.
Ku iya pengawa milih pelilih Debak nyadi palan program nya laban ngerunding pelilih nya endang siti ari palan ke suah dituntung penusah bah di Beotong.
Tandu iya, simulasi penyanga penusah nya deka diatur ba selampur Sarawak lalu sebedau tu kala diatur ba Tatau, Bintulu enggau Dalat, Mukah.
Ku iya, nyadi sebagi ari chara timpuh panjai dikena mutarka penanggul bah di pelilih Debak dia Perintah Sarawak udah ngemendarka agih dikena bejalaika Projek Nagang Bah beungkus RM30 juta.-TVS
