KUCHING, 18 Nov: Bungkur servis internet di Sarawak diatu nambah ngagai 84.8 peratus dibanding enggau 80.9 peratus ti diripotka Mei 2024.
Menteri Ultiliti enggau Telekomunikasyen Sarawak, Dato Sri Julaihi Narawi madah, dipelabaka 7,000 menara diguna di nengeri tu dikena nyapai bungkur penuh internet manggai ba taun 2030.
“Naka ke diatu, Sarawak bisi 4,581 menara (nyengkaum struktur telekomunikasyen atas begunan) udah tembu ti dibanding enggau 4,447 menara ke udah diripotka maya Aum Kunsil Nengeri (DUN) kena Mei 2024.
“Sepenyampau 4,027 (87.9 peratus) menara uda beoperasyen (on-air) sereta ke bukai nya (12.1 peratus) deka beoperasyen sechara berenggat nyentuk ujung taun 2025,” ku iya lebuh bejaku ba Aum Kunsil Nengeri Sarawak sehari tu.
Ku Julaihi madah, perintah nengeri mega bejalaika program Sarawak Linking Urban, Rural and Nation (SALURAN) ti nyadi sebagi ari chara dikena ngemanahka agi pengawa ngerembaika bungkur internet ke sebedau tu semina dipejalaika Perintah Besai nengah Komisyen Komunikasyen enggau Multimedia Malaysia (MCK).
“Dikena bejalaika program intervensyen tu, Perintah Sarawak ngungkupka belanja sepenyampau RM2.3 bilion lalu siti ari komponen program SALURAN iya nya ngaga menara telekomunikasyen Sarawak Multimedia Authority Rural Telecommunication (SMART) di menua pesisir.
“Sepenyampau 546 ari 600 menara telekomunikasyen SMART udah tembu digaga lalu ari penyampau semua menara ke udah tembu, 400 menara SMART udah beoperasyen,” ku iya.
Tandu iya, semua menara SMART ti beoperasyen nya nyendiaka kededua servis 4G enggau Sarawak Rural Broadband Network (MySRBN) seraya ke bukai deka beoperasyen sechara berenggat ba suku keempat taun 2025.-TVS
