MIRI, 18 Nov: Perintah Sarawak meri komitmen ti tinggi dalam ngemansangka kandang menua pesisir, ku Dato Gerawat Gala.
Sapit Menteri ba Opis Premier Sarawak (Pengereja Pengawa, Imigresyen Enggau Pematau Projek) madah, Bajet Sarawak 2025 ngungkupka sepenyampau RM15.8 bilion enggau RM6 bilion dikena ngemansangka menua pesisir.
“Nyikap menua kita enggau jalai, bekal karan, bekal ai beresi, telefon, endang meri pemar tang perintah pan komited. Baka ke dipadahka aku tadi, ari bajet ti dipejurai RM15.8 bilion nya, RM 6 bilion lebih tauka enti kitai meda ari sukut bajet pemansang.
“Pemansang tu iya nya ungkup rayat, ari RM8.8 juta pemansang iya nya semak RM6 juta dipelanja ungkup pemansang menua pesisir, lalu tu mih dalam kurang 60 peratus bajet pemansang ti khas ungkup pemansang menua pesisir tu, ngambi timpuh laban kitai sechara bererenggat ngaga jalai enggau bekal karan,” ku iya.
Iya madah munyi nya beserimbai Pengerami Nutup Pesta Gelimeh Berawan Sarawak 2024 di Long Jegan, Tinjar, Baram kemari.
Kelimpah pemansang infrastruktur, iya mega ngelalau bansa minoriti di Sarawak, tebal agi komuniti berawan ngambika negapka penyerakup sereta nguna manah hak nyadi bumiputera dikena ngangkatka pengelantang komuniti sida.
Iya mega ngemeratka pemesai guna Pesta Gelimeh, ke diatu nyadi pantar ninting taun dikena ngangkatka lanting budaya komuniti berawan sereta negapka tangkup pengawa tuai enggau identiti komuniti.
Gerawat mega nyukung pengawa ngatur Pesta Gelimeh ti nyadi achara ninting taun dalam mandangla lanting budaya komuniti Berawan.-TVS
