DEBAK, 17 Nov: Pengawa ngatur Program Pengerai Aram Regas KEMAS di Betong endang pantar pemadu manah dikena narap penemu pasal pengerai ba raban staf Opis Pengintu Pengelantang Raban Bansa (KEMAS) enggau komuniti.
Sapit Menteri Pemansang Indu, Anak Mit Enggau Pengelantang Komuniti Sarawak, Datuk Mohd Razi Sitam madah, program baka nya chukup senutuk enggau juluk hari lumba menua kelimpah dikena ngemansangka modal mensia lebih agi di menua pesisir.
“Tu endang seriris enggau juluk polisi pemansang menua pesisir lebih agi ari sukut pemansang modal mensia ngambika ulih besemekih.
“Pengawa ngatur program tu deka meri peluang ngagai bala penyereta ngaul diri ba aktiviti ke ulih ngurangka kusut runding, ngerapitka kaul rama sereta nyungkak kualiti pengidup seriris enggau polisi pemansang menua pesisir,” ku iya.
Iya mansutka jaku nya maya bejadika Program Aram Regas diatur Opis KEMAS Bagi Menua Betong di Dewan Terbuka Futsal Kampung Serembang, kemari.
Ku iya, program nya mega pelasar pemadu manah ngagai bala staf opis KEMAS ngelala status pengerai diri nengah chara ngemeranka daya idup bepengerai seraya ngedut agi pemanah kaul enggau komuniti di menua Betong.
Tandu iya laban ke nyadi opis ke megai tanggungpengawa ngemansangka komuniti, staf opis KEMAS endang patut nyadi chunto dalam ngemeranka daya idup ti bepengerai.-TVS
