KUCHING, 17 Nov: Pekit Main Bol Nembiak Tetutup PETRONAS 2024 dikeandal ulih nempa mayuh agi pemain biak bebakat ngambika bisi disabung ba kelang pekit main bol nengeri enggau menua ba renggat ke lebih tinggi.
Tuai Sekretari Politik Premier Sarawak, Dato Fazzrudin Abdul Rahman madah, inisiatif ke dipejalaika Petroliam Nasional Berhad (PETRONAS) tu patut dichunto ejensi korporat ke bukai nyadi sebagi ari pengawa enggau komitmen dalam negapka lumba ba nengeri tu, kelimpah dikena ngansah bakat baru enggau ngerembaika pengawa main bol di menua tu.
“Sehari tu, berengkah mih ke alai runding bala anak kitai patut berunding ukai semina deka ngarika akademi aja dudi hari.
“Ukai semina deka ngerunding ngarika pelilih menua aja, ukai semina deka ngarika Sarawak tauka Kuching City FC, tang runding diatu mesti manggaika juluk ke lebih besai iya nya, lempaika juluk pemadu tinggi iya nya deka bemain ba tikas antarabansa dudi hari ila, dalam nyadi pemain bol,” ku iya.
Iya ke mega Presiden Gerempung Main Bol Kuching ke mega chairman kunsi pekit mansutka jaku nya maya pengawa nutup Pekit Main Bol Nembiak Petronas 2024 ditu, kemari.
Nangkan ke nya, Menijar Besai Petronas Sarawak, Norazibah Md Rabu madah, inisiatif ngatur pekit main bol tu dipeda nyadi pantar nerenak ulah ke manah kelimpah dikena negapka agi disiplin, semangat bebakih enggau besaup dalam siti raban, mereti sereta nempa ulah ke manah ba raban nembiak di Sarawak.
Tandu iya, pekit nya mega nyadi pantar endur PETRONAS sereta bakih strategik negapka agi pengawa main bol di nengeri tu.
“Kerejasama antara organisasyen endang chukup beguna dikena ngenegapka agi ekosistem main bol di Sarawak.
“Nengah pengawa ngempuruka puncha sereta pengelandik antara opis korporat, ejensi, raban bekuasa sereta gerempung, sida deka ulih ngemansangka program pemansang nembiak, ukai semina deka fokus ngatur pekit aja,”ku iya.
Pekit Main Bol Nembiak Tetutup PETRONAS 2024 di Kuching diatur pengelama dua bulan berengkah 14 September ke udah lalu nutup kelang, lemai kemari.
Pekit tu dipasuk lebih 1,000 pemain beumur antara 10 nyentuk 16 taun ngarika 18 akademi main bol enggau sekula ari menua Kuching, Samarahan enggau Sri Aman.
Kelab Akademi Bola Sepak Tambirat mujur nyadi champion kategori umur baruh 10 taun, lalu gelar champion ba kategori umur baruh 12 taun diempu tim Main Bol PFA Odin.
Udah nya, ba kategori umur baruh 14 taun gelar champion diempu tim Kelab Main Bol KDH Kuching lalu champion ba kategori umur baruh 16 taun diempu tim Kelab Main Bol PFA Odin.
Sama bisi datai mandal Presiden Kaul Komunikasyen Strategik Gerup Petronas, Nooruddin Abdullah @ Liew Sze Hoon, Meinjar Besai Kanan, Kaul Strategik Enggau Komunikasyen Gerup Petronas, Khairuddin M Jaafar, Sekretari Mendam Mysed, Morshidi Fredrick, Tuai Pegawai Eksekutif Kuching City Football Club, Iswandi Ali Hassan, Tuai Pegawai Eksekutif Opis Lumba Sarawak, Awang Putrayusrie Awang Redzuan enggau Tuai Pegawai Media TVS, Sardon Zainal.
Kelimpah PETRONAS sereta Opis Menteri Nembiak, Lumba Enggau Pemansang Pedagang (Mysed) Sarawak, pekit tu mega disukung bala bakih strategik rasmi nyengkaum Gerempung Main Bol Bagi Menua Kuching (KDFA), Kelab Main Bol Kuching City FC (KCFC), Opis Lumba Sarawak (SSC) enggau bakih media rasmi TVS.-TVS
