DEBAK, 17 Nov: Bajet Sarawak 2025 ke udah dibantaika Premier Sarawak Datuk Patinggi Tan Sri Abang Johari Tun Openg maya mungkal Aum Kunsil Nengeri (DUN) Ke-19 endang siti atur dikena negapka agi status wilayuh tu nyadi palan lumur satu dipilih pemeranak puku luar dudi hari.
Sapit Menteri Pemansang Indu, Anak mit enggau Pengelantang Komuniti Sarawak, Datuk Mohd Razi Sitam madah, nya mega dikena nentuka Perintah Sarawak terus mansang nengah penatai pemisi ekonomi baru.
“Ukai semina menua pesisir tang iya mayuh nguing ngagai nempa ekonomi Sarawak nyadi meruan ungkup timpuh ke panjai lebih agi mayuh penatai pemisi ke baru.
“Tu ukai semina ba pemansang ke baka ke suah didinga ngelama tu, Sarawak fokus ngagai hidrogen enggau ke bukai,” ku iya
Razi ke mega ADUN Saribas madah munyi nya maya Program Aram Regas diatur opis KEMAS ba Dewan Terbuka Futsal Kampung Serembang, kemari.
Sama bisi datai Kaban Parlimen Betong Dato Dr Richard Rapu enggau ke bukai.
Ku tandu Razi, iya mega chukup andal enggau strategi ke udah dilanggur enggau deka dipejalaika perintah dikena matak pemeranak puku luar ngagai Sarawak.
Berebak enggau nya, ku iya pemansang infrastruktur ba sitak menua pesisir mega deka mengkang nyadi fokus perintah dalam bajet serak tu.-TVS
