SPAOH, 17 Nov: Pampang Parti Pesaka Bumiputera Bersatu (PBB) Bukit Saban merambu ngambika siti resolusi mosyen dikena ngetanka penuduk Presiden PBB, Datuk Patinggi Tan Sri Abang Johari Tun Abang Openg terus nyadi presiden parti ba konvensyen parti nya taun baru.
Chairman iya, Datuk Amar Douglas Uggah Embas madah, Abang Johari udah nunjukka rikod ke nyulut sereta timpai ke jauh ba pengawa iya lebih agi ba bidang kuasa beresi enggau ekonomi gadung ke udah diaku ba renggat dunya.
“Ari iya terus ngiring PBB enggau Sarawak, kitai ba baruh iring ke chukup manah.
“Kitai udah diaku nyadi wilayah bepenatai pemisi tinggi lalu aku andal kitai deka mengkang ngetan status tu ba taun-taun ti deka datai,” ku iya maya Aum Deligit Indu enggau Nembiak PBB Bukit Saban, sehari tu tadi.
Uggah mega madah, Abang Johari udah nunjukka pemintar dalam nyungkak penatai pemisi nengeri ninting taun.
“Maya mantaika Bajet Sarawak 2025 minggu siti ke udah, iya udah madahka asil penyampau RM14.2 bilion ungkup taun 2025 sereta belanja pemansang manggai RM10 bilion.
“Japai tu chukup besai kenyau menua kitai udah merdeka,” ku iya.
Berebak enggau nya, Uggah mega mengkang ngetanka penuduk iya nyadi Chairman PBB Bukit Saban enggau nadai betanding.
Perambu ngetanka penuduk Uggah ngiring pampang nya dibantaika ex-Kaban Parlimen Betong, Datuk Robert Lawson Chuat sereta nerima sukung penuh ari tuai sereta semua 17 pampang mit parti. -TVS
