KUCHING, 16 Nov: Komisioner Servis Pelajar (SPP) patut bejalaika atur Ngambi Pengajar Khas Sarawak 2024 baka ke udah disetuju begulai enggau Perintah Sarawak nengah Opis Menteri Pelajar, Inovasyen enggau Pemansang Bakat (MEITD).
Sapit Menteri ba Opis Premier Sarawak (Undang-undang, MA63 enggau Kaul Sarawak-Perintah Besai) Datuk Sharifah Hasidah Sayeed Aman Ghazali madah, Perintah Sarawak nyemetak madah genap pekara ke udah disetuju nitihka semaya ba renggat tumu mesti dikeamat sereta dikemujur.
Sempekat nya ku Hasidah deka meri pengandal besai ngagai Sarawak ke mega nyadi siti inisiatif dikena mutarka penanggul suntuk pengajar sekula sekondari enggau primari di Sarawak.
“Senentang isu ngambi pengajar interim baka ke udah dipadah aku endang dikeandal kitai nama pekara ke udah disetuju tu deka dipejalaika.
“Kitai endang enggai ditu kitai deka terus terang madah nama pekara ke udah disetuju ukai semina disetuju ba atas keretas aja tang kitai minta nama ke udah disetuju mesti dipejalaka nitihka utai ke disetuju mih enti nitih,” ku iya.
Iya mansutka pekara nya lebuh nyaut tanya Adun GPS-Opar, Billy Sujang ba Hari Kelima Aum Kunsil Nengeri Sarawak Ke-19 di Kompleks DUN Sarawak ditu kemari.
Sebedau tu diripotka lebih 1,700 chalon udah dalam rintai pandak ungkup atur Ngambi Pengajar Khas di Sarawak, penyampau nya tadi nyengkaum 300 peminta datai ari sida ke bisi penau ngajar datai ari luar Sarawak.
Menteri Pelajar, Inovasyen enggau Pemansang Bakat Dato Sri Roland Sagah Wee Inn nengah sebengkah aum media di Sibu, apin lama ke udah berasai asa ngagai SPP laban puntan ngamatka semaya ngemendarka 1,733 pangku pengawa puang ke bisi nya diisi khas ungkup anak Sarawak.
Ku iya, opis menteri sebedau tu kala nulis surat ngagai SPP minta atur ngambi pengajar khas nya dibuka semina ungkup anak Sarawak aja.
Maya aum media ke diatur ba endur bukai, Roland mega diripotka madah lebih 15,000 ke minta pengawa puang nya endang datai ari anak Sarawak ditangkan 2,000 agi peminta nya datai ari Semenanjung enggau Sabah.-TVS
