KOTA SAMARAHAN, 16 Nov: Sepital Petra Jaya ke tejanggal pengudah digaga kenyau 10 taun ke udah dipelaba dibuka ba suku ketiga taun baru.
Menteri Pengerai, Datuk Seri Dr Dzulkefly Ahmad madah sepital nya sebedau tu digaga nengah agih manggai RM610 juta diatu udah 80 peratus tembu.
“Lebih ari 80 peratus ari diatu, nyadi kami ba menasan ke nembam serak tu laban iya udah iya udah tejanggal pengelama beberapa taun.
“Tang serak tu iya nya 80 peratus semak (deka tembu)…dipelaba operasyen ba suku ketiga taun baru.
“Baka ke udah dipadah aku, besampi aja mih ngambika kitai terus ngansak kunteriktor nya,” ku iya.
Iya madah munyi nya lebuh aum media sepenembu Program MADANI AFIAT & Jelajah Agenda Nasional Malaysia Sihat (ANMS), di Kota Samarahan sehari tu tadi.
Projek Sepital Petra Jaya berengkah 2013 lalu sebedau tu ditaga tembu kena November 2016, tang kunteriktor asal puntan.
Kena Oktober 2021, Menteri Besai maya nya, Datuk Seri Ismail Sabri Yaakob, ngasuh projek sepital ke muat 300 katil nya diambi kunteriktor penyelamat lalu JKR diasuh matau silik dikena nentuka iya ulih ditembu ujung taun 2024. -TVS
