KUCHING, 16 Nov: Sarawak terus chakah ngemansangka pemeruan mengeri nengah chara ngatur lanskdap gadung sereta ngintu pemanah rampa menua.
Premier Sarawak Datuk Patinggi Tan Sri Abang Johari Tun Openg maya bejaku ba Pengerami Makai Lemai Ninting Taun Sarawak Forestry Corporation (SFC) ke diatur ba Kuching nyemetak madahka perintah nengeri komited nentuka pengawa ngatur rampa menua ke meruan ba kandang mengeri.
Abang Johari madah, dikena nyapai juluk nya perintah deka bebendar nyaga palan ekologi enggau nempa mayuh agi ruang landskap gadung ba kandang mengeri.
“Kitai deka ngemansangka pemeruan mengeri. Kandang endur rampa menua ke gadung di dalam kandang mengeri mesti diintu enggau manah,” ku iya.
Ku iya kandang endur baka Bukit Lima di Sibu, Piasau di Miri enggau Stutong di Kuching antara chunto sitak ke dijaga dikena nentuka mengeri-mengeri tu ngembuan “Green Lung” tauka Landskap Gadung laban nya chukup beguna ngagai ekologi.
“Kami keran nentuka iya nya mengeri kitai nyadi mengeri pintar ti ukai semina maju, tang mega bepelasarka pemeruan menua,” ku iya.
Iya nerang Rang Undang-Undang (RUU) Pengeraja Asal Enggau Rampa Menua 2024 ke udah dikemendar ba Aum Kunsil Nengeri (DUN) deka mulaika kuasa penuh dalam nyaga rampa menua ngagai perintah nengeri.
“Sepengudah pangku pengawa tu diberi ngagai kitai, nyadi tanggungpengawa kitai iya nya patut nentuka genap langgur pemansang digaga mesti nitihka standard rampa menua antarabansa enggau nitihka peminta dunya,” ku iya.
Abang Johari mega meri tabi puji ngagai SFC bekau ari pemujur sida ngangkatka Gua Niah nyadi Taba Pesaka Dunya Unesco.
“Pemujur tu endang siti japai ke chukup ngemegahka Sarawak enggau Malaysia, laban mandangka pemesai reti dunya dalam ngintu pesaka budaya kunsi.
“Gua Niah ngarika pemesai reti arkeologi ke nyelai, nengah bukti diuan mensia kena haribulan lebih ari 50,000 taun munya. Tu endang siti kelai basa ke besai ngagai Sarawak enggau Malaysia,” ku iya.
Kena 27 julai 2024 tu tadi Gua Niah udah dipadu nyadi Taba Pesaka Dunya Unesco ba tusun ke-46 Komiti Pesaka Dunya ke diatur ba Delhi, India.
Tu ngujungka Gua Niah nyadi Taba Pesaka Dunya kedua di Sarawak nangkan Taman Negara Mulu.-TVS
