DEBAK, 16 Nov: Pengawa muka baru pampang Agrobank ba Pasar Spaoh dikearapka nyadi nyata laban nya endang udah lama dianti rayat ba sitak nya.
Kaban Parlimen Betong, Dato Dr Richard Rapu meri terima kasih ngagai raban pengatur Agro Bank Berhad laban udah setuju muka baru operasyen sida ba Pasar Spaoh berengkah Januari 2025.
“Meri terima kasih laban sida udah nyendiaka mesin dikena mansutka duit ari bank lalu atur ba sebengkah kedai dalam Makit Baru Spaoh.
“Nyadi aku ngarapka nya ulih nyadi nyata kena Januari tu ila arapka raban Agrobank ulih ngamatka semaya laban nya udah lama disetuju sida iya nya deka muka baru lalu rayat endang meruan nganti.
“Puji Tuhan CEO (Tuai Pegawai Eksekutif) udah mandangka komitmen iya nya deka muka baru (pampang Agrobank) kena Januari tu ila,” ku iya.
Iya madah munyi nya maya dirandau TVS pengudah bejadika Program ‘Jom Sihat’ diatur Opis Pengintu Pengelantang Raban Bansa (KEMAS) Bagi Menua Betong ba Dewan Terbuka Futsal Kampung Serembang, sehari tu tadi.
Ku iya, penumbuh pampang Agro bank mini ba Spaoh nya ila deka mutarka penanggul ditapi rayat ngelama tu maya deka ngatur pengawa ba bank.
Sebedau tu, rambau penemuai ngagai Premier Sarawak Premier Sarawak Datuk Patinggi Tan Sri Abang Johari Tun Openg ba Kompelas DUN Sarawak, Tuai Pegawai Eksekutif Agrobank, Datuk Tengku Ahmad Badli Shah Raja Hussin meri jamin pengawa muka baru pampang mini Agro Bank ba Pasar Spaoh deka berengkah dipejalaika baru Januari 2025.
Tandu iya, raban Agrobank mega dikearapka ngamatka danji meri servis ngagai mensia mayuh baka ke kala diatur sebedau tu.-TVS
