KUCHING, 16 Nov: Penyampau agih belanja besai ungkup pemansang di Sarawak siti bukti ke chukup nyata mandangka komitmen perintah nengeri dalam ngatur pemansang infrastruktur di nengeri tu.
Kaban Kunsil Nengeri (ADUN) Satok Datuk Ibrahim Baki madah, agih belanja ke manggai RM10.9 bilion nya dipelaba ulih ngubah pengidup rata di selampur Sarawak lebih agi nengah program pemansang menua pesisir ke nerima agih manggai RM6.8 billion.
“Penyampau RM10.9 bilion, agih belanja pemansang ke chukup besai kala dibantai nyadi bukti komitmen perintah dikena ngatur pemansang infrastruktur, perengkaguna enggau nyungkak pengidup rayat ba selampur endur di Sarawak.
“Aku chukup muji komitmen perintah ti bekenanas ngemansnagka sitak menua pesisir nengah 62 peratus tauka semak dua pertiga ari agih belanja pemansang,” ku iya.
Iya mansutka pekara nya maya mantaika jaku timbal ungkup Rang Undang-Undang Bajet (2025), 2024 ba Aum Kunsil Nengeri (DUN) ditu, ensana.
Berebak enggau nya, Ibrahim mega madah hak perintah Sarawak dalam undang-undang nengeri endang siti pekara ke enda ulih diangkaika sebarang raban.
Ku iya, hak Sarawak enggau kuasa perundangan ke udah bisi chukup terang dibaruh Kunstitusyen Perintah Besai.
Hak Perintah Sarawak deka meda undang-undang nya dititih enda ulih diangkai sebarang raban. Sida enda ulih peneka ngachau hak Sarawak enggau raban penerit adat baka ke udah dipekat dalam Kunstitusyen Perintah Besai.-TVS
