KUALA LUMPUR, 15 Nov : Menteri Besai Datuk Seri Anwar Ibrahim minta kerejasama ke lebih tegap antara perintah, industri enggau komuniti dikena nentuka nadai cherayan dalam jeman pemansang digital.
Nya alai, Anwar nyemetak madahka beguna amat Malaysia bekerejasama nengah ASEAN baka inisiatif gadung ASEAN enggau agenda digital begulai dikena nyikap pengering genap mena enggau begulai napi pemar.
“Malaysia komited dalam ngerandang pemansang ke meruan nyengkau maya nyadi Chairman ASEAN 2025.
“Aku minta kerejasama ke lebih tegap antara perintah, industri enggau komuniti dikena muka peluang dalam ruang digital enggau nentuka nadai sebarang orang cherayan dalam jeman pemansang digital ke majak angkat,” ku iya nengah siti penerang dalam laman X.
Dulu ari nya, Anwar bisi ngulu sesi ti nungkatka pejuluk ‘Peluang dan Cabaran dalam Revolusi AI’ nyerumba Aum Kepenudi Tuai Pegawai Eksekutif (CEO) Kerejasama Ekonomi Asia Pasifik (APEC) di Peru.
Anwar diatu benung dalam penemuai rasmi ke Lima, Peru sereta ngulu Minggu Tuai Ekonomi APEC (AELW) ke-31 ke diatur berengkah 14 nyentuk 16 November.
Penemuai rasmi nya endang penemuai keterubah Menteri Besai ke rantau Amerika Latin kenyau iya mangku pengawa nya ari taun 2022.
Malaysia endang siti ari 12 ekonomi pemungkal APEC.
Anwar, ke mega Menteri Pekara Wang, madah Malaysia ngembuan juluk deka nguna madah Pemintar Tempa (AI) dikena nyapai pemansang inklusif, napi takah digital enggau isu ulah.
Bekau ari nya, iya madah perintah mega benung numbuhka pelin ke meri perati ngagai inovasi enggau sengkaum bekaul AI.
“Aku mega nekan ke guna dikena matih sereta nambahka pengelandik profesional biak dalam bidang AI dikena napi guna industri sereta ngelengkaska pemansang enggau pengawa digital.
“Bisi mega guna atur bemacham sukut lebuh ngemeranka AI, nyengkaum beranakka puku dalam kuasa gadung, ngintu ai enggau reformasi atur birokrasi ngambika lebih responsif ungkup pemeranak puku,” ku iya.
Anwar nyemetak madahka perati penuh patut diberi ngagai pelajar enggau latih dikena numbuhka atur ke nemban ungkup pemujur dudi hari. -TVS
