KUCHING, 14 Nov: Opis Pemansang Dagang Kayu Ramu Sarawak (STIDC) enggau Worldview Climate Solutions (Malaysia) Sdn bhd kemari udah nyain Sempekat Pemereti Ati (MoA) ti nyadi kelai ngelancharka inisiatif karbon biru (sebengkah karbon ti datai ari ekosistem tasik ba tebing pantai) ke beguna amat di sitak Tanjung Manis.
Sapit Premier Sarawak, Datuk Amar Awang Tengah Ali Hasan madahka, kerejasama tu nitihka sekeda renggat pansik ti dipejalaika kenyau ari taun 2023 ke netapka Tanjung Manis engkeman nyadi taba karbon biru ti meruan.
“Tu siti projek ti deka diserungkai kami begulai enggau sebuah kompeni tebal agi dalam karbon biru ti mungkur pemesai urung 10,000 hektar, kelebih agi bakau.
“Nya alai, kami meri terima kasih ngagai kompeni ti sedia bekerejasama enggau SDITC. Bakau tu ngembuan bekau karbon ke manah, nyadi kami ngarapka projek tu mujur,” ku iya.
Iya madah munyi ngagai pemberita pengudah ngemataka pengawa nyain (MoA) entara STIDC enggau Worldview Climate Solutions (Malaysia) Sdn Bhd di Begunan Kunsil Nengeri Sarawak kemari.
Bekau ari nya, Awang Tengah andal projek nya deka nyungkak pemansang ekonomi di sitak Tanjung Manis.
Iya nerangka , inisiatif nya setipak enggau komitmen STDIC dalam nyaga pengeraja asal ungkup rebak dudi seraya ngerembaika agi pemansang di wilayah tu.
Tandu iya, projek karbon biru nya ngemeratka pengawa nyaga rampa menua, mulaika pemanah ekosistem sereta program komuniti ti betuju ngenegapka ekonomi lokal sereta meransang pengawa ngena tanah enggau chara ti meruan.-TVS
