KUCHING, 14 Nov: Perintah Sarawak meri tumpu senentang pengawa negapka industri kreatif enggau lanting bansa nengeri ti tau meri pemanah ngagai pemansang ekonomi sereta ngintu budaya lokal.
Sapit Menteri Dagang Temuai, Industri Kreatif enggau Seni Pemerindang (Industri Kreatif enggau Seni Pemerindang) Sarawak, Datuk Snowdan Lawan madah, inisiatif nya dipejalaika nengah bemacham strategi ti betuju negapka komuniti lokal ba pengawa ngatur program ti ngangkatka pemanah lanting bansa enggau bedajaka budaya lokal sekalika ba dalam menua tu sereta ba menua luar.
“Opis Menteri aku udah bejalaika beberapa strategi dikena negapka industri kreatif di Sarawak, nyerangkung meri tumpu ba pengawa ngintu budaya, penumbuh ekonomi sereta numbuhka peluang gawa.
“Pia mega, negapka industri kreatif enggau lanting bansa Sarawak nyengkaum numbuhka Kaunsil Seni Sarawak (SAC) ba baruh Ordinan Majlis Seni Sarawak 2008 enggau Kaunsil Kraf Sarawak (SCC) baru ba baruh Ordinan Majlis Kraf Sarawak 2023,” ku iya.
Iya mansutka jaku nya rambau nyaut tanya ADUN Satok, Dato Ibrahim Baki, ba Aum Kunsil Nengeri (DUN) Sarawak Ke-19 kemari.
Snowdan ke mega ADUN Balai Ringin nerangka, nengah geran ninting taun Myseni penyampau sejuta ringgit ba baruh SAC, bisi 40 peminta udah dikemendarka ngena kos penyampau RM953,000 ti meri pemaik ngagai semilan iku orang, 12 gerempung, lapan iku komuniti sereta 11 serikat naka bulan 11 taun tu.
Tandu iya, SCC udah ngatur program baka minggu kraf enggau bazaar kraf dikena mantu komuniti lokal nyual produk sida.-TVS
