SARATOK, 14 Nov: Pemujur Hong Mei Lee tauka dikangau Memey nguasa pengelandik ngaga krafjari Iban dipuji Tuai Rumah Andrew Nyanggau ari Sungai Belong, Melupa.
Ku iya, pemujur endang chukup ngemegahka ati sereta patut nyadika peransang ngagai bala indu bukai lebih agi sida ke diau ba rumah panjai ngambi nguna peluang nya dikena mantu nambahka penatai pemisi..
“Arapka pengawa iya tu (Hong Mei Lee) terus mujur lalu nyadika chunto ngagai semua bala indu ke diau ba rumah panjai.
“Utai tu ukai semina ulih dikena kitai mantaika pengelandik diri empu tang mega ulih nambahka penatai pemisi ba ruang bilik sida iya empu.
“Nyadi aku ngarapka utai tu nyadi chunto mega ngagai semua kitai ke diau ba rumah panjai ke bisi pengelandik ba pengawa pengelandik jari tu,” ku iya.
Nangkan ke nya, Kaban Kunsil Nengeri (ADUN) Krian, Friday Belik madahka perambu diri ke deka deka negapka agi industri krafjari di Saratok ti ulih meri penguntung ngagai pengani rumah panjai nya.
Berindik ari nya, Andrew meransang mayuh agi orang rumah panjai ti ngembuan pengerindu dalam bidang krafjari sereta sama besaup terus ngerembaika pengawa nya.
Tandu iya, pengawa baka nya ulih negapka ekonomi perayat lokal ti bepelasarka krafjari.-TVS
