SARATOK, 14 Nov: Hong Mei Lee, siku indu bansa China beumur 27 taun ari Saratok, mandangka bida penatai asal ukai nyadika penanggul nempa pemujur dalam industri dagang krafjari.
Asil ari pengeransing dia iya diatu balat dikelala nyadi siku pedagang produk krafjari Iban baka kain buri enggau ke bukai.
Iya ti mega dikangau enggau nama memey, berengkah ngaul diri dalam bidang tu pengudah tekait ati meda pemanah asil krafjari Iban ti diasilka bala bakih iya.
Bekau ari nya, iya lalu nguji ngasilka krafjari nya pengudah nirika rumah tangga enggau laki iya, Peter Elin kira enam taun ke udah.
Ujung taun 2023, iya berengkah bejalaika pengawa dagang sechara aktif.
“Aku berengkah ngaga kediri empu (produk) udahnya meda tauka ngiga asai.
“Udah nya bisi ga orang ngasuh aku ngaga buri. Nya alai bepun ari nya, aku lalu berengkah ngaga ke orang lalu bisi mih orang ngudar ari aku.
“Udah nya aku lalu post ga ba media rama kitai kemaya hari tu.
“Ari nya mih aku ditemu orang bisi ngadu utai nya (Kain Buri). Nya alai, ari nya orang lalu ngudar bemacham ngoder baka ngadu Skirt, baju, vest, selampai, tangu lalu pemadu baru bisi orang nguda topi buri,” ku iya.
Ku Memey madah, kelimpah ari skirt enggau vest buri, iya mega bisi ngaga produk baka selampai enggau ketapu buri.
Produk nya ukai semina nerima peminta ari perayat lokal tang mega ari Semenanjung nyengkaum Negeri Sembilan enggau Melaka.
“Dalam sebulan dipelaba dalam sebulan enti rezeki manah lebih ga beribu.
“Tang mih enti nadai enda mih iya datai nitih gaya udar orang bukai nih.
“Arapka pengawa aku ngaduka kain burie tu mujur ngemansangka krafjari lebih baka aku siku indu ba rumah panjai enggau bala ulih mega ulih ngemujurka pengawa ngadu kain burie baka nya mih,” ku iya.
Memey mega ngena pelasar media rama ngelakuka produk krafjari ke udah tembu digaga.
Berekat ari pengeransing, iya mujur matak perati pemeli enggau nentuka produk krafjari iban nya terus dikelala di luar sarawak.
Beduduk enggau nya, iya meransang indu di menua pesisir bela meda potensyel dalam industri krafjari ti siti ari peluang dikena nyungkak penatai pemisi tambah.-TVS
