KUCHING, 14 Nov: Kaban Kunsil Nengeri (ADUN) Baleh, Nicholas Kudi Jantai merambu ngasuh siti Komiti Khas Pengatur Jalai ditumbuh dikena mutarka isu raya jalai penyambung ba sitak iya ke agi bepanggai ngagai jalai batang ke udah balat rusak sereta enda likun ditengah mensia mayuh.
Kenu ku iya, jalai-jalai nya suba kala dikemanah Serikat Konsensi tang diatu jalai nya udah balat rusak sereta belubang ketegal ti nyau nadai agi dikemanah.
“Lebih raya enti maya musin ujan, mayuh jalai tanah nya kepung ketegal tanah tusur, jematan, culvert mayuh udah rusak laban kayu ke dikena ngaga jalai nya udah repuk,” ku iya.
Kudi mansutka penerang nya maya mantaika timbal Rang Undang-undang Bajet (2025) 2024 ba Aum Kunsil Nengeri (DUN) Sarawak sehari tu tadi.
Tandu iya, antara jalai ke balat rusak iya nya jalai nuju Rumah Nading di Nanga Selentang, Rumah Sagen di Nanga Ajan, Rumah James Saka di Nanga Tiau, sereta sekeda sekula ba sitak Gaat enggau Mujong.
Nya alai, iya ngarapka komiti ke bisi nya ila ulih ngatur pengawa ngemanah jalai rusak lebih agi dikena nentuka pengelikun jalai mensia mayuh enggau ngemudahka pengawa ke dikereja mensia mayuh ninting hari. -TVS
