KUCHING, 14 Nov: Tatak penatai pemisi penerima ke ulih nerima bantu wang lebih agi ruang bilik ke begaji RM1,500 patut diinsur ngagai RM1,700, ku Datuk Ding Kuong Hiing.
Kaban Kunsil Nengeri (ADUN) Meradong nya madah, ikas gaji minimun sepenyampau RM1,700 ke deka diterit berengkah 1 Februari 2025 baka ke udah dibantai Menteri Besai Datuk Seri Anwar Ibrahim apin lama deka ngeruga ikas pengulih sida ke dibantu naka tu.
“Ungkup insiatif bantu belanja enggau laptop pechuma, ikas ulih nerima bantu ungkup sesiku orang ke datai ari ruang bilik penatai pemisi per kapita enda ngelui RM1,500 kebendar enda nemban agi, laban Perintah Besai deka niki ikas gaji minimum ngagai RM1,700 taun baru.
“Pekara tu nyangka ngujungka sekeda orang deka enda ulih nerima bantu tu,” ku iya maya mansutka timbal Rang Undang-Undang Bajet (2025), 2024 ba Aum Kunsil Nengeri (DUN) Sarawak sehari tu tadi.
Dulu ari nya, Sapit Menteri Datuk Sharifah Hasidah Sayeed Aman Ghazali kena Hari Dua madahka Perintah Sarawak deka bejalaika atur gaji minimum RM1,700 ngagai orang gawa peribit di Sarawak senutuk enggau pekara ke udah dibantaika Menteri Besai.
Nya alai, iya ngarapka ikas pengulih dibantu nya dipansik baru seriris enggau guna raban nembiak ari raban M40.
“Aku ngarapka ikas pengulih dibantu nya diperunding baru kelimpah pengulih ranan nembiak ari raban M40, tauka lebih manah nyema diberi ngagai semua, lebih agi penatai pemisi Sarawak majak niki ninting taun,” ku iya. – TVS
