KUCHING, 11 Nov: Ungkup keterubah penyampau RM200 juta disediaka perintah Sarawak dikena ngaga rumah enggau perengkaguna baru raban ke gawa perintah berengkah ari taun baru.
Premier Sarawak Datuk Patinggi Tan Sri Abang Johari Tun Openg madahka pekara nya chukup beguna dikena mutarka isu kurang rumah perintah ungkup pekereja perintah.
“Kitai deka ngaga rumah enggau perengkaguna baru ungkup pekereja perintah ba selampur Sarawak enggau nilai skim RM3.55 bilion ti disadang berengkah rambau taun 2025,” ku iya.
Iya munyi nya lebuh mantaika Rang Undang-undang Bajet (2025), 2024 ba Aum Kunsil Nengeri (DUN) Sarawak sehari tu tadi.
Nangkan ke nya ku iya madah, ba baruh administrasyen iya mega ngemeratka pengelantang Raban Gawa Perintah Sarawak (SCS) berindik ari kos pengidup ke majak niki.
“Setipak enggau pengawa ngemaruka Servis Perintah Besai, SCS mega udah nerima nguna ‘Sistem Saraan Perkhidmatan Awam’ (SSPA) ti dipadahka empai lama.
“Nengah SSPA tu mega, kitai deka melanja penyampau RM67 juta dalam Belanja 2025,” tandu iya.
Ba pekara ke bekaul, Abang Johari ke mega Menteri Pekara Wang enggau Ekonomi Baru madahka perintah deka nambahka inisiatif enggau nyendiaka elawin khas ungkup pekereja SCS.
Tu siti inisiatif dikena ngaku pemeri enggau dedikasyen sida, enggau pangka pekara wang ninting taun penyampau RM102 juta ba taun 2025.
“Setipak enggau pengawa ngemaruka tu, kami deka madahka senentang ‘Sistem Prestasi Pengurusan’ ti dikemanah ungkup SCS nuju ngagai pengawa nempa servis perintah ti betikas dunya.
“Nya alai aku ngelalau semua pekereja perintah ngambika terus chakah dalam nambahka produktiviti enggau meri servis ti efisyen ngagai rayat,” ku terang iya.
Sebedau tu iya madahka perintah meretika senentang ka guna pengelantang SCS.
Nya alai, sekeda siri inisiatif deka diatur ba taun 2025 dikena meransang pemansang ti holistik sereta pengelantang pekereja perintah.
“Inisiatif tu mega disediaka enggat agih sepenyampau RM1.8 juta,” ku tandu iya. – TVS
