ABU DHABI, 8 Nov: Sarawak benung chakah ngerembaika kerejasama strategik enggau Abu Dhabi dalam aspek ngatur asil gis ba wilayah tu, ku Datuk Patinggi Tan Sri Abang Johari Tun Openg.
Premier Sarawak nya madahka kolaborasyen nya ngaul Petroleum Sarawak Berhad (PETROS) enggau Mubadala Energy.
“Keterubah ari aspek ngatur asil gis ke bisi di Sarawak.
“Kedua, nyeranggap baru engka ba kandang endur tebing ai Sarawak tu, ke alai kitai deka nempa kerejasama entara PETROS enggau PETRONAS.
“Ketiga iya nya kolaborasyen ari aspek aktiviti ili gis ti diasaika aku senentang Mubadala iya nya sebuah aja serikat minyak ti pemadu tebilang ba kandang endur Timur Tengah,”ku iya.
Iya bejaku munyi nya lebuh dirandau pemberita pengudah ngulu pengawa betemu entara PETROS enggau Mubadala Energy ba sebuah hotel ditu, kemari.
Peneleba besai serikat ti dipenggi perintah Abu Dhabi sereta kerejasama ti ditempa enggau organisasyen besai dunya dipeda nemban, ti sebagi ari langkah rapat Sarawak ngerembaika pemansang industri gis sereta petrokimia.
“Pengawa nyeranggap asil baru ari sukut petrokimia nyadi aku ngarap enggau pemisi sempekat entara Mubadala sereta PETROS, nya ulih numbuhka siti industri.
“Ari nya, kitai deka ngembuan asil bumi ari utara nyentuk selatan Sarawak, tebal agi kandang endur ti bedau diserungkai,”ku iya.
Tandu Abang Johari, pengudah kolaborasyen nya diputuska, Sarawak deka numbuhka opis kaul di Emiriah Arab Bersatu (UAE) nyadi sebagi ari langkah rapat deka negapka kerejasama entara Sarawak enggau Abu Dhabi.
Bedau lama tu tadi, dalam langkar penemuai seraya gawa Abang Johari ke Abu Dhabi, Sarawak udah mujur nempa kerejasama entara Sarawak Energy Berhad (SEB), Sarawak Forestry Corporation (SFC), Abu Dhabi Future Energy Company (Masdar), Gentari enggau Mubadala Energy.-TVS
