SARATOK, 8 Nov: Semua rayat di sitak Kunsil Nengeri (DUN) Krian terus ngasaika pemaik nengah pemisi agih Projek Mit Pemansang Menua Pesisir (MRP) ke nadai putus disadung ngagai sida.
Kaban Kunsil Nengeri (ADUN) Krian, Friday Belik madah serak tu urung 39 penerima nyengkaum Komiti Pemansang enggau Pengelikun Genturung Pendiau (JKKK), Serakup, Biro Indu enggau Rumah Sembiang ba sitak Kunsil Nengeri (DUN) Krian udah nerima aguh sepenyampau RM383, 000 nengah geran Projek Mit Pemansang Menua Pesisir (MRP) 2024 Renggat Kedua.
Ku iya tuju agih nya diberi dikena nentuka pengelantang rayat enggau ngemujurka aktviti ke udah dilanggur sida.
“Sebedau tu pengelama 10 taun kitai (Krian) dibaruh pegai penyakal lalu ari agih endang betatak.
“Nyadi kitai deka naka ulih mantu enda ngira ari ni penatai peranak rumah panjai kitai tetap mantu sekalika nya nengah sekula, PIBG enggau mega gerempung laban sida tu endang patut dibantu.
“Kitai deka nentuka sida sama ampit ngasaika pemansang diberi perintah lalu ulih sama enggau ngemujurka sebarangka aja program enggau aktiviti ke dilanggur perintah.
“Nya alai, ari nya kitai ulih meda sida deka lebih beserakup enggau ngasaika pengidup ke lebih lantang,” ku iya.
Iya mansutka penemu nya maya Pengawa Nyerahka Chek Geran Projek Mit Pemansang Menua Pesisir (MRP) Renggat Kedua 2024 ungkup sitak Kunsil Nengeri bepalan ba Palan Servis ADUN Krian ditu, empai lama.
Ku iya agih belanja nya chukup beguna ke pemaik komuniti ke diau ba menua pesisir.
Ke penerang, naka tu urung RM1.3 juta geran dibaruh projek MRP 2024 udah diserah ngagai 196 penerima.
Renggat keterubah MRP, udah diserah kena bulan Julai ke udah ngagai 157 penerima ke ngaul agih manggai RM917,000.-TVS
