ABU DHABI, 7 Nov: Sarawak deka ngelangkar pelin kuing tuju pemansang gis hidrogen ngambika ulih rembus ngagai makit kuasa beresi global.
Premier Sarawak, Datuk Patinggi Tan Sri Abang Johari Tun Openg madahka, pelin nya deka mekuhka aspek bekal hidrogen.
“Pengawa ngeluarka hidrogen mesti dipejalaika ba rega ke ulih dibeli ngambika pelanggan ulih ngena kuasa gadung nya sechara enda betatak.
“Pekara nya nyerangkung peminta, mai reti teknologi sel kereban api mesti maju sereta nya deka numbuhka peminta lebih agi ba dalam pengangkut mensia mayuh ke alai hidrogen nyadi kereban api ke dikena pengangkut nya,” ku iya madah.
Iya mansutka jaku rambau program randau khas begulai enggau TVS sereta UKAS pengudah nyadi panel beserimbai enggau Eksibisyen & Konferens Petroleum Antarabansa Abu Dhabi (ADIPEC) 2024 ba Palan Eksibisyen Nasional Abu Dhabi (ADNEC), kemari.
Pengawa ngaul diri Sarawak ba dalam industri hidrogen deka muka peluang ungkup aktiviti ili ke bukai, seraya mantu meransang penumbuh ekonomi nengeri.
Sebedau nya, rambau program berandau pasal ‘Tangkup Pengawa Asia Dalam Nentuka Makit Hidrogen’, iya nerangka pansik teknologi pemadu baru nya endang beguna amat dikena ngurangka kos pengeluar hidrogen sereta nyadika kuasa nya kereban api alternatif ti ulih dibeli ba rega ke patut.
Tandu iya, kuasa gadung sigi dikemeratka dikena napi ubah klimet global, tang kos pengeluar ke tinggi sereta kuasa ke mayuh dikena ngasilkan hidrogen entara pemar besai ti ditapi.-TVS
