SARATOK, 7 Nov: Sepenyampau RM22.5 juta udah diungkupka perintah Sarawak dikena ngemujurka Projek Transformasyen Menua Pesisir (RTP) di sitak Kunsil Nengeri (DUN) Krian kenyau ari taun 2021.
Kaban Kunsil Nengeri (ADUN) Krian, Friday Belik madahka sebagi ari projek udah enggau benung dipejalaika, lalu iya ngarap, semua projek nya ulih ditembuka sebedau ujung taun tu.
“Berengkah ari taun 2021 iya nya sebedau aku nyadi Pengari Rayat nyentuk ke taun 2024, kami udah ngungkupka sepenyampau RM22.5 juta ba baruh RTP dikena bejalaika 138 projek RTP di DUN Krian.
“Nyentuk diatu projek nya bisi ke udah tembu penuh, bisi dalam proses ungkup dipejalaika sereta mega bisi ke bedau berengkah dipejalaika agi.
“Nyadi kami ngarapka projek ba baruh Langgur Pemansang Lumpar ke-12 tu ulih ditembuka semua nya sebedau apus taun 2025, sebedau nyingkang ke Langgur Pemansang Malaysia Lumpar ke-13,” ku iya.
Friday mansutka jaku nya ngagai pemberita pengudah datai ngulu Pengerami Nyerahka Replika Chek Program Tulin MADANI Pelilih Saratok di Kampung Kaba, kemari.
Tandu iya, pejalai projek RTP nya beguna amat laban projek nya deka meri penguntung sereta empas ekonomi ti besai ngagai komuniti ba kandang menua pesisir.
Ku iya, projek nya mega iya nya chara ti pemadu manah sereta ngasi dikena ngerumban pemansang infrastruktur ba rumah panjai tauka genturung pendiau.-TVS
