BELADIN, 7 Nov: Pengawa ngatur Program Negapka Pelajar Sarawak (SEEP) ngembuan tuju dikena nentuka pemutus gred pukul rata peresa Sijil Pelajaran Malaysia (SPM) ulih nyapai 4.74, kelimpah dikena nentuka lebih mayuh nembiak sekula nangkup penetap dalam ngambi bidang sains ba taun 2026.
Menteri Pelajar, Inovasyen Enggau Pemansang Bakat Sarawak, Dato Sri Roland Sagah Wee Inn madahka, program SEEP ke nguna agih belanja penyampau RM15 juta setaun nya mega mandangka komitmen rat perintah Sarawak deka ngangkatka tikas kualiti pelajar di wilayah tu.
“Enggau bajet ninting taun RM15 juta, kitai mikir diatu ke dipelanja Perintah Sarawak khas ungkup anak kitai.
“Tu baru siti Program SEEP aja, agih belanja tu deka diberi ungkup honorarium pengajar bisi insentif, ungkup pengajar mih sereta mayuh agi kereban ngajar, ‘pentafsiran setara’ enggau pemansang aplikasyen matau,”ku iya.
Ku iya, mayuh pemar deka ditapi raban iya enti beratika ngagai ripot sejarah pemutus peresa SPM ba wilayah tu dalam timpuh 10 taun ke udah.
Tandu iya, entara fokus besai dalam ngatur program seep iya nya dikena nyukung pelajar nembiak sekula ti kurang penatai pemisi (B40) ba pom tiga, empat enggau lima ke agi kurang ba tikas pelajar ke alai pemutus peresa kepenudi sesi akademik (UASA) 2023 ngayanka 44 peratus bulih gred e ke baruh.
Roland nerangka, raban iya deka nentuka tetiap ringgit ti dipelanja perintah ulih mantu ba pemujur pemansang pelajar sekula nembiak di selampur wilayah tu.-TVS
